Kryebashkiaku i Bulqizës, Lefter Alla u përball me SPAK pasditen e sotme, ku i është përgjigjur pyetjeve në lidhje me videoskandalin që u publikua ditën e djeshme. Sapo ka dalë nga SPAK, ai është përballur me gazetarët të cilët prisnin një deklaratë nga ana e tij.
Mirëpo, Alla ka vendosur ta ‘kyçë’ gojën, ku mezi tha dy fjalë.
“Do kemi kohë të bisedojmë herë tjetër. Nuk kam komente sot. Komentet i kam në prokurori. E ka në dorë drejtësia”, ishin fjalët e tij.
Nga ana tjetër edhe gazetari investigativ Artan Hoxha ishte i pranishëm në SPAK, ku dha dëshminë e tij lidhur me publikimin e videos. Ai tha se nuk ka asnjë lidhje me ish-deputetin, Ervin Salianji, të cilin Lefter Alla tha se do e padisë.
